Ancuontro anternacional de Pendones no Nasico

---

Recriando l que dantanho se passaba na Tierra de Miranda, quando mocidades e sous Pendones s’ajuntában i cunfraternizában na fiesta de l Martes de Páscoa (Nasico) no Santuairo de Nuossa Senhora de l Naso, pudimos assistir l passado die 01 de maio al Ancuontro de Pendones de la Tierra de Miranda, astanho reforçado cun cinco Pendones de Sayago (Biriatos de Fariza) i cun cinco Pendones de Aliste (Alcanhiças), a somar a ls pendones de la Pruoba, Aldeia Nuoba, San Juan de las Arribas, Cicuiro, Infainç, Paradela, Malhadas, Cérceno, Dues Eigreijas, Zenízio i Speciosa. Al todo, más de 20 Pendones amostrórun sues quelores i feitius nun Terreiro de muitas i marcantes tradiçoes an todo l Praino: l Naso.

Esta fui ua einiciatiba de la Junta de Freguesia de la Pruobra, de la Cunfraria de l N.ª Sra. de Naso-Picon a quien la ALCM – Associaçon de Lhéngua i Cultura Mirandesa dou l saber i ls teçtemunhos que yá zde 2014 ten benido a recolhir suobre este tema. Quaije cien anhos açpuis estas seinhas eidentitairas tornórun a cumprir la tradiçon , algo que fai parte de l fondo ADN de l Praino. A julgar pula aceitaçon de las pessonas que alhá stubírun, pal anho que ben l númaro dessas seinhas cun ouriges na recunquista crestiana por cierto que será maior.